ساكن قصادى وبحبه
ــــــــــــــــــــــــــــــــــــــــــــ
ساكن قصادى وبحبه
بحبه
و أتمنى أقابله
فكرت أصارحه
لكن أبداً
أبدا مقدرش أقوله
وفضلت استنى استنى الأيام
فى ميعاد ما يظهر
وميعاد ما يرجع
وفكل خطوة أرسم أحلام
تكبر في قلبي
والقلب يطمع
و أقول مِصيره حيحسّ بيّا لو يوم صادفنى وسلّم عليّا
حيلاقى صورته ساكنه فعنيّا و يحس بيها فرعشة إيديا
كنت حاسة إن حبه كل مادا كان بيكبر كان بيكبر
أبقى عايزة لو يكون لى قلب غير قلبى الصُغيّر
فِضْلِت أمانى
مع الليالى
تِقرَّب حبيبى اللى ساكن قصادى
حبيبى اللى ساكن
اللى ساكن
اللى ساكن قصادى وبحبه
وفيوم صحيت على صوت فرح بصيت من الشباك
زينة وتهانى وناس كتير دايرين هنا وهناك
شاوروا لى بإيديهم
وقالوا لى عقبالك
هللت من الفرحة
هللت مِالفرحة
هللت مِالفرحة وسألت
قالوا جارك ،
جارك حبيبى
حبيبى اللى ساكن قصادى وبحبه
رُحت الفرح بليل ورسمت فى عنيا الفرحة
ساعة ما كان بيشيل بإيديه وبعنيه الطرحة
شربت شرباتهم وأنا قاعدة بصّلهم
لحدّ ما قاموا ومشيت أوصّلهم
حتى الأمل مبَقاش من حقى افكر فيه
بعد الليلة دى بقى غيرى أولى بيه
بقى غيرى أولى بيه
وتُهت وسط الزحام ما حد حاسس بى
عايزة أجرى أجرى أجري وأرجع أتوه والناس يقولوا حاسبى
ناس فى طريق النور
ما بين فرح وشموع
وأنا فى طريق مهجور
و منوراه بدموعى
ولقيتنى فايتة من جنب بابه
لا هو دارى بقلبى ولا بِـاللي نابُه
يا ويلى ويلى من طول غيابُه
ويا ويل أيامى من جرح عذابُه
عذاب الجرح اللى فاتُه لي وسابُه
ساكن في قلبي وساكن قصادي وبحبه
وبحبه
حبيبى ساكن
حبيبي ساكن
حبيبي ساكن قصادي وبحبُّه
ــــــــــــــــــــــــــــــــــــــــــ
ــــــــــــــــــــــــــــــــــــــــــ
غناء نجاة الصغيرة
.
Add a Comment
<<Home